رسالة عتب .. شاهد شايف وعايف .. بقلم .. طه عبد الوالي الشوابكه

البلقاء اليوم - رسالة عتب...شاهد شايف وعايف.. بقلم .... طه عبد الوالي الشوابكه

البلقاء اليوم ----السلط



معاليك شو يعني لو إنّك خليت المدارس إتداوم ؟؟
معاليك الجيل قاعد بتدمّر والصفوف الأولى كفّك عليهم (راحو بالرجلين )
طلاب زغار بدهم تأسيس صح يعني وجاهي مش اون لاين
يا رجل أقلّك كيف تشتغل إنت وجماعتك مشان البلد تمشي صح؟؟
التعليم واقف .. عارف شو يعني ؟؟

يعني :
ولي الأمر ماكل هوا وعايف حاله ومش ملحق تلفونات وحزم انترنت
الطلاب طلطميس لا جمعة ولا خميس
الأمهات الله يعينهم مش ملحقين حفظ الكتب وتقديم امتحانات ودواوين تغشيش
المدارس عفّنت وطلعت ريحتها لا شايح ولا رايح ..
المعلمين والمعلمات يا دوب ماخدين رواتبهم
السواقين والمرافقات قاعدين يشحدو ويلمو علب بيبسي من الحاويات مشان يصرفو على أولادهم من شهر 3 العام الماضي معاليك


معاليك .. لو إنك قسّمت كل مدرسة نصين ، نص يدوام اسبوع ويعطّل أسبوع والعكس بالعكس ، هيك رح يصير تباعد والمدرسة تقدر تتحمل المسؤولية
يعني المدارس اللي مأمنينها على طلابنا مش واثقين فيهم أنهم يعملو اجراءات كويسة حتى يضمنو سلامة الطلاب والعاملين ؟ يعني معاليك (أمين وخاين ) بصير !!!

معاليك مش ضروري امتحن الطلاب بعشر وحدات او عشر فصول خليني امتحنهم بنص المادة عالأقل بتعلمو بشكل وجاهي هيك بكونو استفادو احسن من الأون لاين تاعكو(ونص العقل بغني عن ملاته)
معاليك إبعدو السياسية عن التعليم وخليهم يروحو يلعبو سياسة بعيد عن المدارس والطلاب ومستقبل الأجيال
معاليك المدارس لما تشتغل رايحة البلد كلها تتحرك وتشتغل
الدكاكين والمولات والمواصلات ومحطات البنزين وشركة الكهربا وشركة المي وووو.............

يا زلمة بدك حدا يقلّك ؟؟
إنت ليش اسمك وزير ...
انت وزير إلنا مش وزر علينا
طه عبدالوالي الشوابكه..
معلم عتقي (قديم )

---