وجه فرشة "الشعب فوق كل الشعارات".

البلقاء اليوم - البلقاء اليوم --السلط


وجه فرشة
التوقيت الشتوي مثل الزيّ الباكستاني “قميص الليل” طويل جداً بحيث يغطي ركبتي اليوم..تغرب الشمس على الساعة الخامسة ،ويبدأ السهر باكراً..وموعد النوم يأتي عند الزرّ الثالث من ساعات الليل..
بُعيد المغرب بقليل ،صدر صرير حزين من صوت البوابة يشبه خواء بقرة مريضة ، ثم ارتطم باب “الخويّخة” بقوة ، عدّل أبو يحيى من جلسته وبقي يراقب باب المضافة ليرى من الضيف..صوت خربشة وعرج في المشية ،ثم وقف الزائر بالباب وضع عكازه على جنب الحائط وبدأ يخلع حذاءه بيده،بدأ بالقدم اليمنى أسندها على ركبته اليسرى تماماً كرقم “4” بالانجليزي ثم خلع الفردة الثانية..دخل وبيده “قطرميز مقدوس” مكتوب عليه من الخارج رُب بندور طبيعي خالي من المواد الحافظة.. جاء به جوز فزّه لرفيقه وجاره العزيز “أبو يحيى ووضعه خلف الباب محبة لا مجاملة ولا ردّ جميل ..



* مسّيك بالخير..قالها أبو يحيى وهو “يصبّ فنجان قهوة” سادة..



* جوز فزّة : هلا الله يقويك…ما بشوفك بتطلع..ولا بلشان
* أبو يحيى : بهالدار وين أروح ..
* جوز فزّة : كيف بتتوقّع الرمي السنة؟..
* أبو يحيى: والله الزيتون ما عليه حزر..
* جوز فزّة : بسولف عن الانتخابات ..
* أبو يحيى: والله ما بدري مين نازل ولا مين طالع..
* جوز فزّة : بقولوا ما بتوصّل 20%..
* أبو يحيى: نسبة الزيت؟ لا بتوصّل أكثر..
* جوز فزّة : بسولف عن الانتخابات..
* أبو يحيى: جعله لا حدا انتخب..
* جوز فزّة “متكياً على وسادتين”: اللي بشوفه قدّامي مقسوم قسمين..اشي مستوي خالص..واشي لا والله بعد بدّه شوي..
* أبو يحيى: لعاد كيف بدّك ..اشي كبيس واشي عصير..اشي بدك تدقّه ع راسه وهو يضحك..واشي بدك تهرسه وتصب عليه مي باردة..
*جوز فزّة: بسولف عن الانتخابات أني..
* أبو يحيى: فكّرت عن الزيتون..
* جوز فزّة : بيقولوا وصّل 100ليرة..
* أبو يحيى: ردّ العجنة كاملة؟..زي كل سنة..
* جوز فزّة: بسولف عن الانتخابات..
* أبو يحيى: فكّرت عن الزيتون..
* جوز فزّة : الناس خايفه من الغشّ…
* أبو يحيى: لا تشتري غير من المزراب
* جوز فزّة: بحكي عن الانتخابات
* أبو يحيى فكّرت عن الزيتون
* جوز فزّة : أبو يحيى جيت أفاتحك بموضوع…مرشّحنا حاب يحطّ قارمة قماش على برندتك الغربية..ترى “الزلمة وجه”
* أبو يحيى : انت شايفه “وجه” هسّع؟
* جوز فزّة: آه..
* أبو يحيى: أني شايفه “وجه فرشه” بعد أسبوع..
* جوز فزّة :كيف يعني؟
* أبو يحيى: الاسبوع الجاي بس تخلص الانتخابات ،بنشيل اللافتة وينسويها وجه فرشة..وهيك بنحقق شعاره الانتخابي “الشعب فوق الشعارات”..

احمد حسن الزعبي
ahmedalzoubi@hotmail.com

---